Tags

, , , ,

ሁሉም የንግድ ባንኮች የተጠቃሚዎችን ፍላጐት እያከበሩ ይሠራሉ እንጂ፣ የክርስቲያንም ሆነ የሙስሊም ተብለው የሚቋቋሙ ሃይማኖታዊ ባንኮች እንደማይኖሩ የኢትዮጵያ ብሔራዊ ባንክ አስታወቀ፡፡  ከፍተኛ የመንግሥት ባለሥልጣናት ባለፈው ሳምንት ዳያስፖራውን ባነጋገሩበት ወቅት፣ በሰሜን አሜሪካ ከዳያስፖራው ጋር የተደረጉ 17 ስብሰባዎችን መካፈላቸውን በመጥቀስ፣ መድረኩን ሲመሩ ለነበሩ የመንግሥት ባለሥልጣናት ጥያቄ ያቀረቡ ግለሰብ፣ ‹‹እናንተ የተጠየቃችሁትን አትፈጽሙም፤ አገር የጋራ ነው ሃይማኖት የግል ነው ይባላል፡፡ የዘምዘም ባንክ ምሥረታ ለምን ተቋረጠ? በገንዘብ በኩል የሙስሊሙ ሕዝብ ተሳትፎ ለምን እንዲጠናከር ጥረት አታደርጉም?›› ብለው ነበር፡፡
ለጥያቄው መልስ የሰጡት የኢትዮጵያ ብሔራዊ ባንክ ምክትል ገዥ አቶ ዮሐንስ አያሌው፣ ኢትዮጵያ ውስጥ ሃይማኖትን መሠረት አድርጐ የሚቋቋም ባንክ እንደማይኖር በመግለጽ፣ ከወለድ ነፃ ባንክ ማቋቋምን በተመለከተ በወጣው መመርያ መሠረት ባንኮች በሙሉ አገልግሎቱን ለመስጠት ተዘጋጅተዋል ብለዋል፡፡
ከወለድ ነፃ አገልግሎት ማግኘት የሚፈልጉ የማኅበረሰብ ክፍሎችም በሁሉም ባንኮች በተዘጋጁ መስኮቶች ተጠቃሚ መሆን እንደሚችሉና ባንኮችም አገልግሎቱን ለመስጠት መዘጋጀታቸውን አቶ ዮሐንስ ገልጸዋል፡፡
ከወለድ ነፃ የሆነ ባንክ ለማቋቋም በምሥረታ ላይ የነበረው የዘምዘም ባንክ አደራጆች በወቅቱ መመርያ ባለመኖሩ ብሔራዊ ባንክን ጠይቀው ብሔራዊ ባንክ ረቂቅ መመርያ አውጥቶ ነበር፡፡ ዘምዘም ባንክም የረቂቅ መመርያውን መውጣት ተከትሎ ወደ አክሲዮን ሽያጭ በመግባት የመጀመርያ ጠቅላላ ጉባዔውንም ማድረጉ ይታወሳል፡፡
በምሥረታ ላይ የነበረው ዘምዘም ባንክ ጠቅላላ ጉባዔውን ቢያደርግም፣ በብሔራዊ ባንክ ከወለድ ነፃ ባንክ ማቋቋምን አስመልክቶ የወጣው የመጨረሻው መመርያ በምሥረታ ላይ የነበረው ባንክ ሥራውን እንዳይቀጥል አድርጐታል፡፡
በወቅቱ ብሔራዊ ባንክ ከወለድ ነፃ አገልግሎት የሚሰጥ ራሱን የቻለ ባንክ በኢትዮጵያ ማቋቋም እንደማይቻል፣ ሁሉም ባንኮች ግን ከወለድ ነፃ አገልግሎት የሚሰጡበት መስኮት እንደሚያደራጁ መግለጹን ጠቅሰን መዘገባችን ይታወሳል፡፡
በብሔራዊ ባንክ ውሳኔ መሠረት በኢትዮጵያ ሃይማኖታዊ ባንኮች ስለማይመሠረቱ፣ ተገልጋዩ ኅብረተሰብ በተለያዩ ንግድ ባንኮች ውስጥ በመረጡት መንገድ አገልግሎቱን ማግኘት ይችላሉ፡፡

ምንጭ ሪፖርተር ጋዜጣ